Korte a honra 50 mil florin pa daño i perhuisio pa homber ku a keda sin brasa
WILLEMSTAD. – Banda di e kastigu di prizon di 24 luna kondishonal i 2 aña sin reibeweis i 3 aña di prueba, pa e hòmber Enthley Martina (23), huesa bai di acuerdo tambe ku e máksimo ku lei penalta permití pa loke ta trata daño i perhuisio ku ta un suma di 50 mil florin.
No ta usual ku korte ta honra petishonnan di daño i perhuisio di e magnitut aki den kaso penal, pero den e último dos simannan aki por a tuma nota ku den dos kaso separá i di dos huesdiferente a honra e suma di 50 mil florin komo daño i perhuisio k uta e suma máksimo ku por pidi den e proceso penal.
E akusado Enthley dia 3 dui febrüari 2013 a kousa un aksidente di tal magnitutku a laga e víktima Mayron P. sin su dos brasanan i hopi komplikashon atrás.
Korte a haña ku enthley a manehá su outo di un forma iresponsabel i ku velosidat haltu i pa motibu ku el a pèrdè kòntròl riba e outo el a alkansá Mayron i su partner ku tabata koriendo baiskel frontal.
E impakto tabata teribel, pa motibu ku e víktima a bai haltu i a bai dal den un palu i a keda drumí einan.
E heridanan tabata múltiple, Kaminda ku el a haña sla serio na kabes ku ainda e tin molèster di dje, a pèrdè hopi djente i su kakumbein a kibra.
E echo ku su brasanan tabata di tal forma lastimá, no por a skapa nan mas, dókter mester a amputá tur e dos brasanan. Tur dos pianan i hep a keda seriamente lastimá.
Pues un persona ku tabata gosa di un bon kondishon i salú, den un fregá di wowo su vida a kambia i awor e no por yudasu mes mas.
Tur esaki pa motibu ku Enthley a manehá un outo, sin reibeweis, ku velosidat hopi haltu i alabes e tabata bou di influencia di alkohòl ta pèrdè kòntròl i kousa e aksidente aki.
Abogadonan mr Richard Pols, eksperto den kasonan ku tin di aber ku daño maerial i inmaterial huntu ku abogado Saran Inderson a sa di yega na un nota kaminda ku nan ta ilustrá e seriedat di di e loke ku a pasa i alabes si ta na Ulanda, e gastunan lo tabata muchu mas haltu ku aki n Kòrsou.
Pa duna un ilustrashon pa kada brasa a amputá e víktima lo mester a haña 32 mil euro, pues 64 mil euro.
Esei ta sin papia di otro gastunan ku e lei ta permití.
Si kue e tarifa di mas abou di salario durante 35 aña largu, ta nifiká ku e akusado tin di paga un suma di 338 mil florin. Pero asina tin hopi gastu mas k uta bin aserká.
Awor aki Myron tin d dil i sobrebibí sin ku e tin brasa.
Esaki a pone ku hues a honra e petishon di e abogadonan na un suma di 50 mil florin i e sobrá e víktima lo por kontinuá ku e proceso den korte sivil.
Bron: Extra