Abogado Eisden di e bufete di Inderson a pleita ku éksito: No por proba ku akusado tabata sa ku rifel tabata kaliber .22
Willemstad – Abogado Eisden di e bufete di Inderson a pleita pa libertat ku eksito ayera ora ku el a defendé Urbiglenn C. ku tabata keda akusá di poseshon di arma di kandela. Den su alegashon trese dilanti, Eisden a duna di konosé ku no por haña Urbiglenn kulpabel, pa un kos ku e no tabata na altura di dje. Hues finalmente a uni su mes ku e loke ku Eisden a trese dilanti i asina apsolbé tur akusashon ku tabatin den kontra di Urbiglenn i asina pone ku e ta un hòmber liber. Urbiglenn ta keda akusá di ta den poseshon di arma di kandela dia 4 mart di e aña aki. Ta trata di un rifel Sherydan ku a keda modifiká den un rifel di kaliber .22. E akusado a duna di konosé ku el a kumpra e rifel aki mas ku un aña anterior i nunka e tabata sa ku e rifel aki tabata modifiká den un arma di kandela. Na su opinion semper el a usa bala di kèlki pa kore ku kachónan ku tabata mata kabritu di su tata. E último aki el a atkerí despues di a keda konsehá pa polis. Pero tur kos a kue un dimenshon kastigabel, ora ku a surgi un problema, kaminda ku Ronald W. A menasa un otro hende ku e rifel aki. Abogado Eisden a duna di konosé ku no por kondena un hende sin ku e sa ku e ta konsiente di ta andando ku algu kastigabel. Es mas no a haña niun proyektill di kaliber .22 tampoko. Despues di a mustra riba e vários hurisprudensianan i tambe deklarashon di e mama ku ta konfirmá ku nunka nan no tabata sa ku e rifel ta un rifel modifiká, abogado Eisden a pleita pa libertat. Despues di a studia e kaso, hues a uni su mes ku e abogado su punto di sali i a duna di konosé ku en bèrdat no por proba ku Urbiglenn lo por tabata sa ku ta trata di un rifel modifiká. Pa loke ta trata e ko-akusado, Ronald W. hues ta haña e akusashonnan promé no proba, esta ku tabatin menasa, pero pa loke ta trata poseshon di arma di kandela, si e hues ta haña probá. Esaki a pone ku hues a kondena Roland na 6 luna kondishonal.
Bron: Extra 11 september 2012