Korte no ta honra gobièrnu den su petishon: Veredikto Huisman ta keda para de kaso Brantspùit
Willemstad – ayera Korte Superior (HOF) a dikta fayo den e kaso di Stephen Huisman, ku Gobièrnu ta akusá di a faya ku pago di 1.3 mion florin ku a keda paga na Tigris N.V. o sea Ben Witteveen. Den Korte di promé Instansha hues a bisa ku Huisman no a faya den e pago aki, pero gobiernu no ta keda kontentu i ta apelá. Pero esaki no ta sali na fabor di gobièrnu i e kaso finalmente ta keda para ku e mesun resultado den prome instansha. E petishon di gobièrnu na korte ta pa ordená Huisman paga e suma di plaka ku a keda paga pa dos brantspùit. Gobièrnu tabata ke pa korte haña Huisman responsabel pa e forma no diligente ku el a traha i ordená pago di e dos vehíkulonan di paga kandela. Pero esaki gobièrnu no ta logra. Korte no ta mira niun kaminda ku Huisman a faya i a ordená gobièrnu paga tur gastunan di korte. E kaso ku gobièrnu a entamá kontra di Stephen Huisman, tabata un petishon den dos parti. E prome parti ta pa haña Huisman responsabel pa e plaka ku a keda paga na un tal Ben Witteveen i si Gobièrnu lo gana e kaso, e di dos parti di e kaso lo tabata, pa kuantu plaka Huisman a perhudiká gobièrnu. Abogado Saran Inderson ku tabatin e interesnan di Huisman na su enkargo a trese dilanti den su alegashon ku e loke ku Gobièrnu ke logra ku e kaso ku nan a entamá kontra di su kliente, lo no haña oidu di korte. Den un veredikto fórmula den 7 hues e dia ei a duna di konosé ku niun kaminda den e dokumentashon (diki) ku a keda entrega den e kaso aki, no tin un kaminda ku Huisman por ta responsabel pa 1.3 mion florin ku a keda paga na TrigisN.v. o sea Ben Witteveen. For di mail nan relevante ku a keda usa den korte, ta indiká ku ta gobièrnu mes a paga e brantspùitnan riba kuenta personal di Witteveen.
Lesa tambe: Kaso kontra Huisman mester keda trata den korte di ámtenar'
Bron: Extra 9 yanüari 2013