Despues di a trese for di Ulanda sospecha di atrako arma: HOF ta pone Rowengelo den libertat HOF ta uni su mes ku abogado Saran Inderson
Willemstad – Dia 17 di sèptèmber último, outoridatnan hudisial ulandes a lanta Rowengelo Clemencia for di riba su kama den oranan di mardugá i a pone riba avion pa Kòrsou. E akshon aki a tuma lugá riba petishon di outoridatnan di Kòrsou ku ta investigando un kaso di atrako i tiroteo ku a tuma lugá dia 18 di aprel na Desis Mini Mall. Abogado mr Saran Inderson ta di opinion ku for di dia ku a trese e sospechoso Kòrsou, polis no a hasi nada ku e investigashon i awor aki hopi di e aspektonan ku por a usa pa investigá no por hasi mas i komo tal Rowengelo ta sera pòrnada. E tribunal a uni su mes ku e abogado i a pone Rowengelo den libertat.
Despues ku abogado Inderson a kuestioná e forma inhumano ku tabatin Rowengelo sera, el a drenta den detaye di e investigashon mes. Pues dos aspekto importante ku defakto Ministerio Públiko no por a defendé de Korte.
E mesun puntonan aki Inderson a presentá na hues komisario, pero ku no a mira motibu pa suspendé detenshon di Rowengelo i a uni su mes ku fiskal ku prolongashon di detenshon. Un dia despues Rowengelo ta apelá e desishon di hues komisario i akinan un biaha mas Inderson a amplia riba e kaso den un nota di defensa di 7 página atendiendo aspektonan importante di e kaso. Na promé lugá nada no a sosodé ku e investigativo pa realisá un foto konfrontashon of un tras di glas, tabata parse ku polis no tabata ke a hasi esaki. Dor di tarda asina tantu, e foto di Rowengelo a sali den "front page" di un matutino. Pues un foto konfrontashon no ta na su lugá mas. Rowengelo semper a ninga ke e tabata metí ku e atrako i segun e abogado, e testigu ta un hende i un hende por faya. Pero e echo ku a tarda asina tantu ku e investigashon, Inderson ta di opinion ku awor tal at i no tin otro opshon di pone su kliente den libertat. E tribunal a uni su mes kompletamente ku e abogado i a pone Rowengelo mesora den libertat.
Bron: Extra 11 oktober 2013