Suidadano no por kita for i impreshon: Influensia di eks Minister a pone ku no a firma derecho di "erfpacht"
Willemstad – E suidadano Hubert Neuman no por kita for di e impreshon ku Cornelis 'Chucho' Smits su influensia komo minister den e gobièrnu transitorio ku resien tabata na mando, a pone ku no a firma su derecho di "erfpacht" i asina para un negoshashon di 3 anja ku e tabatin ku e mesun Chucho Smits. Esaki a pone ku Neuman i su yu a entamá un asina yama "spoedeisende bodemprocedure" kontra di gobièrnu di Kòrsou pa kumpli ku e loke ku a negoshá ku Domeinbeheer i ku tabata kla pa keda firma. Abogado Saran Inderson tin e interesnan di Neumann a su enkargo. Domeinbeheer a asta duna su palabra ku tur kos ta pa firma pa Neuman haña parti di tereno, kaminda ku su kas ta komo erfpacht.
Ta trata di un disputa di un tereno na Montaña Rey di 5.000 meter kuadra ku Hubert Neuman su tata tabata hür for di aña 1950 for di gobièrnu. Akinan Hubert a biba tur su añanan huntu ku su tata i na 1988 e tata a fayesé i Hubert a keda ku e kas, kaminda ku einan tambe el a lanta su famia.
Hubert Neuman a kontinuá ku e pago di hür di e tereno i esaki ta paga te ku 2014. Ironia ta ku dia 10 di mart 2008 gobièrnu ta duna Chucho Smits 8.050 meter kuadra di tereno na Montaña Rey, ku ta inkluí e 5.000 meter kuadra ku Neuman tin su hür paga.
E loke ku ta hasi e disputa aki muchu mas inkreibel, ta e echo ku Chucho tabata amigu di kas di Neuman su tata. E kas ta keda riba un seru ku un bista fantástiko riba Fuik i e área di Santa Barbara.
Despues ku e tata a muri, Chucho a interesa mesora den e tereno i no a tene muchu kuenta ku e yu ku a lanta einan. El a kuminsá ku su intentonan i a bai Domeinbeheer pa por haña e tereno na 'erfpacht'. Pero esei no a bai fásil ei i el a kuminsá ku un negoshashon ku e yu pa e por haña e tereno ku tin un kas ariba. E negoshashon aki a dura largu i un dado momentu Chucho a asta ofrese Neuman plaka pa e bai for di e tereno. A laga balora e kas i komo tal Chucho tabata dispuesto pa paga e suma ei, Pa Neuman bai.
Neuman no tabata interesa den plaka, pero e balor sentimental di su kas, kaminda ku el a lanta tin muchu mas balor ku e plaka ku a ofrese. Esta e loke ku a keda ofrese por asta keda konsiderá komo un asina yama "rot op premie".
E negosiashonnan a dura 3 aña largu i na final a yega na un akuèrdo ku Domeinbeheer lo a duna Neuman dos pida kavel na total di 1.000 meter kuadra i e sobra 7.050 Chucho por haña.
Bron: Extra 18 oktober 2013