Sospechoso tres asesinato tin miedu pa nan venen'é den prison, abogado a pidi rapòrt di sikiater i sikólogo
Willemstad – e akusado den kaso di Magnus, Elvis Kuwas alias Mònster, a pidi korte ayera pa ordená prison pa stòp di dun'é kuminda riba su nòmber. E tin miedu ku nan ta venen'é. Tur dia e ta hañá kuminda ku su nòmber riba dje. Mr. Saran Inderson huntu ku su kolega Eisden a defendé Mònster.
Di akuerdo ku Mr. Inderson t'asina ku su kliente a keda detené pa e "kaso Sangura". E kaso Sangura ta asesinato di e hòmber Arnaud dia 8 yüni 2012. E abogado a pidi pa tende algun testigu, entre nan Monica i un eks-amiga dje akusado. Tambe a pidi resultado di DNA i kombersashon di tap. E abogado a pidi pa laga traha rapòrt di sikiater i sikólogo di Mònster den tur tres kaso.
Tin e kaso "No Limit" kual ta asesinato di Conceptio; dia 27 di yanüari 2013 ke tende algun testigu. Entre e testigunan tin un señora ku por duna detaye di un boto ku lo ta envolví den e kaso aki ku lo ta na fabor di Mònster.
Den kaso Magnus e kasa di Mònster tin un "alibi". Den kaso Magnus tambe abogado ke tende vários testigu entre otro tambe un muhé ku tabata huntu ku Mònster ora e notisia a kore ku a asesiná Wiels. Mr. Inderson a sigui bisa ku su kliente ta sera den Blok 7 den prison na Koraal Specht. E no ta sinti su mes sigur den e blok aki. El a haña indikashon ku lo venená den su kuminda. A pidi kushina pa tene na kuenta ku esaki i a pidi mando di prison pe akusado no haña kuminda riba su nòmber. Ta mihó laga e akusado mes drecha su kuminda òf laga kumpra kuminda for di pafó pe. A bisa ku lo trese kambio den esaki, pero esaki no a sosodé. Ainda, i konsekuentemente e no por kome adekuadamente. Su menú ta loke e ta kome di kantina, kual ta spaguèti di chines. Ora e spaguèti kaba e tin di kambia kos ku otro presu pa haña òf paga pa e spaguèti. E abogado a pidi prison òf a lo ménos ministerio públiko pa enkargá pa e akusado por haña kuminda no riba su nòmber. Wes a indiká ku esaki no ta na dje pa tuma tal desishon.
Bron: Extra 19 desèmber 2013