Den e kaso di e lei di seguro básiko Korte a dikta ku e kaso di Penshonadonan kontra Gobièrnu no tin urgensia
Den e kaso ku 4 penshonado a entablá kontra di gobièrnu pa e asuntu di e lei riba seguro básiko wes Mr Eunice Saleh a rechasá pa trata e kaso komo un prosedura di fondo urgente i a referí partidonan pa e prosedura normal di interkambio di papeleo ku lo tuma lugá awe mainta 9 or.
E penshonadonan Cornelis de Graaf, Allan Chatlein, Joyce Wasker i Bruna Ballinge di 25 di òktober 2913 pa medio di nan abogado Mr Saran Inderson a pidi korte pa trata nan kaso komo un di prosedura di fondo urgente. Abogado di gobièrnu Mr. Glenn Camelia dia 9 di desèmber ta tin opheshon pa hasi e proseso mas kòrtiko debí ku e problemátika di lei di seguro básiko ta unu bastante kompleho unda lo mester trata diferente lei, tratado, protokòl i kalkulashon di prima di penshun.
Segun abogado Mr Glenn Camelia e kaso ku e penshonadonan a kuminsá kontra gobièrnu no ta fia su mes pa keda trata den un proseso simplifiká debí ku ta bai bira imposibel pa trata ku tur e leinan den e defensa di gobièrnu. Mas aleu abogado Mr Glenn Camelia a trese padilanti ku e penshonadonan no tin un interes urgente den e kaso di e lei di seguro básiko debí ku e lei a drenta na vigor for di dia promé di febrüari 2013 siendo ku ta te 25 di òktober numa e penshonadonan a kuminsá un kaso kontra gobièrnu. Korte a dikta ku no tin urgensia den e kaso i a referí e penshonadonan pa un kaso normal di interkambio di papel. E kaso sigui awe mainta 9 or.
Bron: Ultimo Noticia 13 yanüari 2014